नेपालअखबार, काठमाडौँ । परराष्ट्रमन्त्री डा.आरजु राणा देउवाले नेपाल र थाइल्यान्डका बिचमा कैयौँ सांस्कृतिक समानताहरू रहेका उल्लेख गरेकी छन् । आज राजधानीमा आयोजित ‘थाइ फ्लेभस् ‘इन द हिमालज्’ ट्रेड फेयरको उद्घाटन गर्दै उनले नेपाल र थाइल्याण्डबिच ऐतिहासिक सम्बन्ध रही आएको र दुई देशबिचमा सांस्कृतिकलगायत धेरै क्षेत्रमा समानता रहेका बताइन् ।
मन्त्री राणाले दुई देशका बिचमा पाहुनाहरूको स्वागत, बहुधार्मिक र बहुसांस्कृतिक मूल्यमान्यताहरूको सम्मान, सहिष्णुता तथा पर्यटन र यसमार्फत प्राप्त गर्न सकिने समृद्धिलगायत समानताहरू रहेका चर्चा गरिन् ।
पर्यटन दुई देशका बिचको साझा समृद्धि एवं सहकार्यको क्षेत्र हुनसक्ने स्पष्ट गर्दै मन्त्री डा.राणाले नेपालमा पनि पर्यटनको अथाह सम्भावना रहेकाले पर्यटन एवं हस्पिटालिटीका क्षेत्रमा लगानी गर्न थाई लगानीकर्ताहरूलाई आग्रह गरिन् ।
नेपाल उद्यमशिलताका क्षेत्रमा अघि बढिरहेको र हस्तकलालगायत कैयौँ वस्तुको उत्पादन विश्व बजारको आकर्षण पनि बनेको भन्दै उनले नेपालमा लगानी गर्न थाई उद्योगी व्यवसायीहरूलाई आग्रह गरिन् ।
नेपाल र थाइल्यान्ड कहिल्यै पनि कुनै उपनिवेशमा नरहेका स्वतन्त्र र स्वाधीन राष्ट्र रहेका प्रसङ्ग उल्लेख गर्दै मन्त्री डा.राणाले प्रधानमन्त्री केपी शर्मा ओलीले हालै थाइल्यान्डको भ्रमण गर्नुभएको र त्यस क्रममा सरकारी तथा निजी क्षेत्रमा सहमति र समझदारी भएका स्मरण गरिन् ।
सो भ्रमणबाट दुई देशबिचको सम्बन्ध थप प्रगाढ बनेको जनाउँदै उनले आगामी दिनमा यस प्रकारका उच्चस्तरीय भ्रमणहरूलाई निरन्तरता दिनुपर्ने पनि उनले बताए । नेपालस्थित थाई दूतावास र भाटभाटेनी सुपर मार्केटद्वारा सो फेयरको आयोजना गरिएको हो ।