नेपालअखबार, काठमाडौं । चीनले आफ्नो घरेलु बजार सुरक्षित गर्न कृषि मल निर्यातमा कटौती गरिरहेको उद्योग स्रोतहरूले रोयटर्स समाचार एजेन्सीलाई बताएका छन्। यसले अमेरिका-इजरायल र इरान युद्धका कारण पहिले नै अभाव झेलिरहेको विश्वव्यापी बजारमा थप दबाब सिर्जना गरेको छ।
मध्य मार्चमा, बेइजिङले नाइट्रोजन-पोटासियम मलको मिश्रण र केही फस्फेटका प्रकारहरूको निर्यातमा प्रतिबन्ध लगाएको स्रोतले रोयटर्सलाई बताएको छ।
समाचार एजेन्सीका अनुसार, युरियाका लागि विद्यमान प्रतिबन्ध र निर्यात कोटाहरूका साथै, चीनबाट अब केही सीमित मलहरू, विशेषगरी अमोनियम सल्फेट मात्र निर्यात गर्न सकिनेछ। यसको अर्थ चीनले गत वर्ष निर्यात गरेको कुल परिमाणको आधादेखि तीन-चौथाइ भाग अब प्रतिबन्धित भएको छ । रोयटर्सको अनुमान अनुसार यो करिब ४ करोड मेट्रिक टनसम्म हुन सक्छ।
चीन विश्वका सबैभन्दा ठूला मल निर्यातकहरूमध्ये एक हो- जसले गत वर्ष १३ अर्ब डलरभन्दा बढी मूल्यको मल निर्यात गरेको थियो।
होर्मुज स्ट्रेट हुँदै हुने मलको ढुवानी रोकिएको बेला यो प्रतिबन्धको खबर बाहिर आएको छ। यस जलमार्गबाट हुने ढुवानीले समुद्रमार्फत हुने कुल आपूर्तिको करिब एक तिहाइ हिस्सा ओगट्छ।
बीएमआई का वरिष्ठ कमोडिटिज विश्लेषक म्याथ्यू बिगिनले रोयटर्सलाई भने, ‘चीनले सधैं यस्तै शैली देखाउँछ, विश्वव्यापी अभावको समयमा उद्धार गर्न आउनुको सट्टा चीनले आपूर्तिमा रोक लगाउँछ।’
बिगिनले थपे, ‘उनीहरूले खाद्य सुरक्षालाई प्राथमिकता दिइरहेका छन् र आफ्नो घरेलु बजारलाई मूल्यवृद्धिको धक्काबाट बचाइरहेका छन् ।’