नेपालअखबार, काठमाडौँ । रसुवाको सीमावर्ती क्षेत्र टिमुरे हुँदै भोटेकोशी र त्रिशूली नदीमा भीषण बाढी आएको छ। तिब्बततर्फुहिमताल विस्फोट भएको आशंका जल तथा मौसम विज्ञान विभागले गरेको छ ।
विभागले नदीको बहाव अचानक बढेपछि तटीय क्षेत्रमा उच्च सतर्कता अपनाउन अपिल गरेको छ।
बाढी पूर्वानुमान शाखाका प्रमुख विनोद पराजुलीका अनुसार आज भदौ १० गते बिहान करिब ९ बजेको समयमा तिब्बततर्फबाट टिमुरे नाका हुँदै ठूलो बाढी नेपाल प्रवेश गरेको हो।
यो बाढी वर्षाका कारण नभई आकस्मिक रूपमा आएकाले तिब्बतमा हिमताल विस्फोट भएको हुनसक्ने प्रारम्भिक अनुमान गरिएको पराजुलीले बताए । बाढीको वास्तविक कारण पत्ता लगाउन विभागले चिनियाँ अधिकारीहरूसँग समन्वय गरिरहेको पराजुलीको भनाइ छ।
उपग्रह बाट खिचिएका तस्बिरहरू र अन्य प्राविधिक माध्यमबाट हिमताल विस्फोटको पुष्टि गर्ने प्रयास भइरहेको पराजुलीले जानकारी दिए ।