नेपालअखबार,पाल्पा । निरन्तरको वर्षाका कारण हुन सक्ने जोखिमलाई मध्यनजर राखेर सिद्धार्थ राजमार्ग अन्तर्गत दोभान-सिद्धबाबा सडकखण्ड राति सवारी सञ्चालनमा रोक लगाइएको छ ।
जिल्ला प्रशासन कार्यालय पाल्पाले सूचना जारी गर्दै बिहीबारदेखि १२ असोजसम्म दोभान-सिद्धबाबा क्षेत्रमा बेलुका ७ बजेदेखि बिहान ५ बजेसम्म सवारी सञ्चालनमा पूर्णतया रोक लगाएको जनाएको छ ।
लगातार भइरहेको वर्षाका कारण पहिरो, बाढी तथा डुबानको जोखिम बढेपछि सवारी आवागमन बन्द गर्ने निर्णय गरिएको सहाय प्रमुख जिल्ला अधिकारी राजेश पन्थीले जानकारी दिए ।
यात्रु तथा सवारी साधनको सुरक्षालाई प्राथमिकतामा राख्दै जोखिम न्यूनीकरणका लागि यो निर्णय गरिएको स्थानीय प्रशासनले जनाएको छ ।
उक्त क्षेत्र सो राजमार्गको सबै भन्दा जोखिमको क्षेत्र मानिन्छ । वर्षपछि ढुंगा खस्ने र पहिरो जाने जस्ता समस्याले यात्रुले सास्ती खेप्दै आएका छन् ।
बिहीबार बिहान पनि सिद्धबाबा क्षेत्रमा ढुंगासहितको पहिरो खसेपछि केहीबेर सवारी आवागमन बन्द भएको थियो ।