नेपालअखबार, काठमाडौँ । नेशनल पेमेन्ट गेटवे प्रकरणमा दोषी ठहर भएका सुनिल पौडेलविरुद्ध अख्तियार दुरुपयोग अनुसन्धान आयोगले अकुत सम्पत्ति आर्जनको मुद्दा दायर गरेको छ ।
अख्तियारले आइतबार राष्ट्रिय सूचना प्रविधि केन्द्रका तत्कालीन कार्यकारी निर्देशक तथा नेपाल टेलिकमका निलम्बित प्रबन्ध निर्देशक पौडेलविरुद्ध गैरकानूनी सम्पत्ति आर्जन गरी भ्रष्टाचार गरेको भन्दै मुद्दा दायर गरेको हो ।
शुक्रबार विशेष अदालतले नेशनल पेमेन्ट गेटवे प्रकरणमा पौडेलसहित ८ जनालाई दोषी ठहर गरेको थियो । विशेष अदालतले पौडेललाई सजाय निर्धारण गर्न वैशाख २५ मा पेशी तोकिएको छ ।
अख्तियारले सार्वजनिक पदमा बहाल रहँदाको आयव्ययको तालमेल नदेखिएको ठहर गर्दै पौडेलविरुद्ध २३ करोड ७५ लाख ४६ हजारभन्दा बढी बिगो मागदाबीसहित मुद्दा दायर गरेको छ ।
पौडेल पदमा रहँदा पारिश्रमिक, भत्ता, शेयरलगायत एक करोड १९ लाख २४ हजार ८ सय ४६ आयआर्जन गरेको अख्तियारको ठहर छ । यस्तै २४ करोड ९४ लाख ७१ हजार १७१ खर्च तथा लगानी गरेको देखिएको अख्तियारले उल्लेख गरेको छ ।
आम्दानी र खर्च अनुसार पौडेलको २३ करोड ७५ लाख ४६ हजार ३ सय २४ रुपैयाँ बराबरको खर्च तथा सम्पत्ति अवैध देखिएको अख्तियारले जनाएको छ ।
राष्ट्रिय सूचना प्रविधि केन्द्रमा रहँदा पौडेलले राष्ट्रिय भुक्तानी प्रणाली स्थापना गर्न भनेर सफ्टवेर र हार्डवेयर खरिद गरेको तर सञ्चालनमा नल्याएर भ्रष्टाचार गरेको अख्तियारको ठहर छ ।
