नेपालअखबार,लण्डन । जेफ्री एपस्टिनसँगको सम्बन्ध र यौन दुर्व्यवहारको आरोपलाई लिएर लामो समयदेखि दबाबमा रहेका बेलायती राजकुमार एन्ड्रयूले ड्यूक अफ योर्क लगायत सबै शाही उपाधि र सम्मानहरू त्याग्ने घोषणा गरेका छन्। एक व्यक्तिगत विज्ञप्ति जारी गर्दै एन्ड्रयूले राजा र परिवारसँगको छलफलपछि यो निर्णय लिएको बताएका छन्।
उनले आफ्नो विरुद्धका आरोपहरूको निरन्तरताले राजा र शाही परिवारको काममा अवरोध पुर्याएको निष्कर्ष निकालेको उल्लेख गरेका छन्। यद्यपि, उनले आफूमाथि लागेका आरोपहरूलाई कडा रूपमा इन्कार गरिरहने अडान दोहोर्याएका छन्। यो निर्णय राजा चार्ल्स र राजकुमार विलियमसँगको परामर्शमा भएको हो।
यससँगै एन्ड्रयू अब ड्यूक अफ योर्क रहने छैनन्, यद्यपि उनी राजकुमारको रूपमा भने चिनिइरहनेछन्। उनले ब्रिटनको सबैभन्दा पुरानो र वरिष्ठ सम्मान अर्डर अफ द गार्टरको सदस्यता पनि त्यागेका छन्।
यसअघि नै ‘कार्यकारी शाही’को भूमिका छोडेका एन्ड्रयूको सार्वजनिक जीवनमा यो थप ठुलो कटौती हो। उनका पूर्व-पत्नी सारा फर्गुसन अब डचेस अफ योर्कको रूपमा चिनिने छैनन्, तर उनका छोरीहरूले राजकुमारीको उपाधि भने कायम राख्नेछन्।
यौन दुर्व्यवहार सम्बन्धी अदालतको मुद्दा सल्टाए पनि एपस्टिनसँग उनको सम्बन्ध र पछिल्ला सञ्चारका कारण उनी निरन्तर चर्चा र छानबिनको घेरामा छन्।
बीबीसी