नेपालअखबार, काठमाडौं । नेपाल कृषी अनुसन्धान परिषद (नार्क)का कार्यकारी निर्देशक डा. ध्रुवराज भट्टराईले नार्कबाट किसान एवं सरोकारवालालाई दिइने सेवा, सुविधा चुस्तदुरुस्त तथा गुणस्तरीय बनाउँन तर्फ ध्यान दिन निर्देशन दिएका छन् ।
नार्कको केन्द्रीय कार्यालय खुमलटार, ललितपुरमा आज नार्कका निर्देशक तथा बिभिन्न केन्द्र महाशाखाका प्रमुखसंगको बैठकमा उनले यस्तो निर्देशन दिएका हुन् । कार्यालयको बिभिन्न सेवाको पारदर्शिता एवं सेवाको बारेमा बिभिन्न निर्णय गर्दै बैठकले प्रभावकारी कार्यान्वयन गर्दै अगाडी बढनुपर्ने उनले बताए ।
नार्कको सबै अनुसन्धान केन्द्रलाई सफा, सुन्दर बनाउँने, साथै बाथरुमदेखी कार्यालय कक्ष, ल्याब, सफा राख्ने, नियमित स्टाफ बैठक अनिवार्य गर्ने, कार्यक्रमको बारेमा सबै कर्मचारीका बीचमा नियमित छलफल गर्ने, बार्षिक कार्यक्रम र बजेट सबैले देख्ने ठाउँमा टाँस गर्ने लगायतका निर्णय गर्दै बैठकले प्रभावकारी रुपमा कार्यान्वयन गर्ने निर्णय गरेको छ । कार्यक्रम कार्यान्वयन गर्न आवश्यक कमिटीहरु खरिद कमिटी, भौतिक परिक्षण कमिटी, कार्यालय र अनुसन्धान व्यवस्थापन कमिटी लगायतका सबै तयारी साउन महिनाको २० गते भित्रमा गर्ने र सबै क्रियाकलापहरु समयमा संचालन गर्ने गराउँने निर्णय बैठकले गरेको छ ।