बेँसीसहर–चामे सडकमा कालोपत्र सुरु

यस सडकको तेस्रो चरण तथा अन्तिम चरणअन्तर्गत कालोपत्रे सम्पन्न भएसँगै रोड माकिर्ङ, रोड फर्निचर (पेन्टिङ) गर्ने, क्र्यास बेरियर र किलोमिटर पोस्ट राख्नेलगायतको काम हुने भएको अधिकारीको भनाइ थियो । उनका अनुसार विभिन्न पटक म्याद थप गर्दै आगामी असार मसान्तभित्रमा सबै काम सम्पन्न हुने सम्झौता भएको छ । हालसम्म ६५ प्रतिशत सडक स्तरोनन्तिको काम सम्पन्न भएको डुम्रे बेँसीसहर चामे सडक योजना कार्यालयले जनाएको छ ।

विसं २०८० असार मसान्तसम्म कालोपत्र गर्नेगरी विसं २०७८ असारमा सम्झौता गरेर काम अघि बढाइएको थियो । कार्यालयका अनुसार रू ५२ करोड ९६ लाखको लागत अनुमान गरिएको उक्त सडक रू २५ करोड ३२ लाखमा कालोपत्र गर्ने सम्झौता छ ।

कार्यालयका इञ्जिनियर अधिकारीले निर्धारित समय सकिएकाले आगामी मङ्सिर ९ गतेसम्म सम्पन्न गर्नेगरी म्याद थप गरिएको जानकारी दिए । “मङ्सिर ९ गतेसम्म सम्पन्न गर्नुपर्ने भए पनि निर्धारित समयमा सम्पन्न नहुने देखिएको छ । तिहारलगत्तै काम सुरु हुने र यसको म्याद पुनःथप गरिनेछ”, उनले भने ।

मनाङ जिल्लालाई सडक सञ्जालमा जोड्ने सरकारको योजनाअनुरुप विसं २०५१ देखि सडक डिभिजन कार्यालय दमौली तनहुँले सडक निर्माण सुरु गरेको थियो । पछि जनयुद्ध र अन्य विभिन्न कारणले तत्कालीन नेपाली सेनाले उक्त सडक विसं २०५७ देखि बनाउने जिम्मा पाए पनि सेनाले शान्ति प्रक्रियापछि मात्रै काम अघि बढाएको थियो ।

बेँसीसहरमा रहेको तत्कालीन नेपाली सेनाले विसंं २०६९ मा सडकको निर्माण पूरा गर्दै डिभिजन सडक कार्यालय दमौलीलाई हस्तान्तरण गरेको थियो । पैसठ्ठी किलोमिटर रहेको यस सडक लमजुङतर्फ ३५ किमी र मनाङतर्फ ३० किमी पर्दछ । रासस