नेपालअखबार,इस्लामाबाद । पाकिस्तानको उत्तर–पश्चिमी क्षेत्रमा आएको विनाशकारी बाढी र पहिरोका कारण ३०० भन्दा बढीले ज्यान गुमाएका छन् भने २०० भन्दा बढी मानिस अझै बेपत्ता भएको अधिकारीहरूले जनाएका छन्।सबैभन्दा प्रभावित खैबर पख्तुनख्वा प्रान्तको बुनर जिल्लामा मात्र कम्तीमा २०९ जना हराइरहेका छन्। तर यो सङ्ख्या अझ बढ्ने आशङ्का गरिएको बीबीसीलाई स्थानीय अधिकारीहरूले बताएका छन्।
बुनरका उप–आयुक्त कार्यालयका प्रवक्ता जहाँगीर खानका अनुसार उद्धार टोलीले ८ जनाको शव पहिचान नहुँदा आफै गाड्नु छ। सडकहरू भत्किएर धेरै आफन्तहरूले आफ्ना प्रियजनहरूको शव दाबी गर्न सकेका छैनन्।
प्रान्तीय उद्धार प्रवक्ताले एएफपीलाई बताए अनुसार, १० देखि १२ वटा गाउँ आंशिक रूपमा पुरिएका छन्। शंगलामा पनि ‘दर्जनौँ मानिस हराइरहेका’ प्रान्तीय विपद् व्यवस्थापन प्रमुख असफन्द्यार खतकले बताएका छन्।
दक्षिण एसियाको वार्षिक वर्षाको तीन–चौथाइ मनसुनमै पर्छ। पहिरो र बाढी सामान्य भए पनि वैज्ञानिकहरूले जलवायु परिवर्तनका कारण यस वर्षका यस्ता घटनाहरू अझै भीषण र बारम्बार भइरहेको चेतावनी दिएका छन्।
हालसालै भारत प्रशासित काश्मीरमा समेत मुसलधारे वर्षाले ठुलो क्षति पुर्याएको छ, जहाँ ६० जनाभन्दा बढीको मृत्यु भएको थियो। पाकिस्तान प्रशासित काश्मीरमा मात्रै यसै सातामा ९ जनाको मृत्यु भएको छ भने गिलगित–बाल्टिस्तान क्षेत्रमा थप ५ जनाले ज्यान गुमाएका छन्।
पाकिस्तान सरकारले २१ अगस्टसम्म उत्तर–पश्चिमका धेरै स्थानहरूमा भारी वर्षाको चेतावनी जारी गरेको छ। यस वर्षको मनसुन सुरु भएदेखि अहिलेसम्म ६५० जनाभन्दा बढीको मृत्यु भइसकेको छ।
पञ्जाब प्रान्तमा मात्रै गत वर्षभन्दा ७३% बढी वर्षा भएको र यो जुलाई महिनामै अघिल्लो वर्षको सम्पूर्ण मनसुनभन्दा बढी मृतक सङ्ख्या दर्ता भएको जनाइएको छ।
विशेषज्ञहरूका अनुसार, उत्तरी पाकिस्तानका हिमनदहरू द्रुत गतिमा पग्लँदै गइरहेका छन्, जसका कारण पहिरो र बाढीको जोखिम अझ बढेको छ।