नेपालअखबार,काठमाडौं । नेपाल खानेपानी संस्थानले कर्मचारी पदपूर्तिका लागि आह्वान गरेको १९८ पदको विज्ञापन रद्द गरेको छ। संस्थानको केन्द्रीय कार्यालय त्रिपुरेश्वरले आज एक सार्वजनिक सूचना जारी गर्दै गत वैशाख ६ गते गोरखापत्रमा प्रकाशित खुला, आन्तरिक र बढुवा प्रतियोगिताका सबै विज्ञापनहरू रद्द गरिएको जानकारी दिएको हो।
संस्थानका अनुसार, पूर्वाधार विकास मन्त्रालयको गत असार ३२ गतेको पत्रअनुसार साविकको संस्थान अस्तित्वमा रहने नदेखिएको र सम्बन्धित स्थानीय तहहरूमा हस्तान्तरण प्रक्रिया अघि बढाउनु पर्ने भएकाले विज्ञापन रद्द गर्न निर्देशन प्राप्त भएको थियो। सोही निर्देशन र लोक सेवा आयोगको भदौ ३ गतेको सहमतिअनुसार संस्थानको पदपूर्ति समितिको बैठकले विज्ञापन रद्द गर्ने निर्णय गरेको हो।
विज्ञापन रद्द भएसँगै दरखास्त दिएका आवेदकहरूले आफूले बुझाएको परीक्षा दस्तुर फिर्ता पाउने भएका छन्। दस्तुर फिर्ता लिन इच्छुक आवेदकहरूले यो सूचना प्रकाशित भएको मितिले ३५ दिनभित्र संस्थानको तोकिएको शाखा कार्यालय वा प्रधान कार्यालयमा निवेदन दिनुपर्नेछ।
