नेपालअखबार,नामिबिया । प्लेअफ खेलमा जर्सीलाई २५ रनले हराउँदै अमेरिका विश्वकपको क्वालिफायरका लागि छनोट भएको छ । २३१ रनको लक्ष्य जोगाउने क्रममा अली खानले ३२ रन खर्चँदै ७ विकेट लिएपछि जर्सी ४७।४ ओभरमा २ सय ६ रनमा सीमित भयो ।
कुनै पनि एसोसिएट राष्ट्रका खेलाडीको एकदिवसीय खेलमा यो दोस्रो उत्कृष्ट बलिङ प्रदर्शन रहेको थियो । यसअघि एसोसिएट राष्ट्र रहँदा अफगानिस्तानका रासिद खानले वेस्ट इन्डिजविरुद्ध १८ रन खर्चेर ७ विकेट लिएका थिए । सबै एकदिवसीय खेलमा यो बलिङ प्रदर्शन सातौँ स्थानमा रहेको छ ।
त्यस्तै, यूएईले पनि अन्य टोलीसँगको हेड टू हेड रेकर्डका आधारमा अघि रहँदै विश्वकप छनोटमा आफ्नो स्थान सुरक्षित गरेको छ । आईसीसीका अनुसार यूएई अब जर्सीसँग पराजित हुँदा नामिबिया र क्यानाडाले अंक बराबरी गरे पनि यूएई हेड टू हेड टाइब्रेकरमा दुई टोलीभन्दा अघि रहनेछ ।
