नेपालअखबार, काठमाडाैं। नेकपा एमालेका अध्यक्ष केपी शर्मा ओलीले वर्तमान सरकारले ढाँट्न र छक्याउन बाहेक केही नगर्ने बताएका छन्।
मंगलबार पार्टी केन्द्रीय कार्यालयमा पार्टीको बागमती प्रदेश कमिटीको सातौं बैठकमा ओलीले सरकार गठन भएको सात महिनामा ढांट्नु र छल्नबाहेक अरू काम नगरेको बताएका हुन्।
उनले जेठ २४ गते पेस गर्नुपर्ने मिटरब्याजसम्बन्धी विधेयक असार ५ गते ल्याएर एमालेले पास गर्न दिएन भन्ने बनाएको बताए।
‘यिनीहरुनै हुन, जसले बैशाख २४ गते पेश गर्नुपर्ने कुरा असार ५ गते पेश गर्छन पार्लियामेन्टमा । के हेरेर बसे ? राष्ट्रियसभामा असार ५ गते पेश गर्छन, बैशाख २४ गते गर्नुपर्ने त्यो अध्यादेशसम्बन्धि प्रतिस्थापन विधेयक । बैशाख २४ देखि असार ५ सम्म के हेरेर बसे?,’ उनले भने।
ओलीले सरकार उदासिन, लापरवाह र सामन्तको पक्षमा भएकाले नियोजित रूपमा अन्तिम दिन विधेयक पारितका लागि संसदमा ल्याइएको आरोप लगाए।
संसदमा बोल्न दिएन भनेर प्रधानन्त्रीले झुट प्रचार गरेको ओलीको भनाइ थियो।
‘कहाँ गर्नु भयो उहाँले स्पष्टिकरण ? बल्ल हिजो स्पष्टिकरण दिन्छु भनेपछि हामीले दियौं त,’ उनले भने।