मेक्सिकोमा चर्चको छाना खस्दा सात जनाको मृत्यु, ३० जना पुरिएको आशङ्का

मानिसलाई बाहिर निकाल्ने काम तीव्र गतिमा भइरहेको छ । स्थानीय सञ्चारमाध्यमले दश जनालाई भग्नावशेषबाट निकालेर अस्पताल लगिएको जनाएको छ । यो दुर्घटना सिउदेद मदेरोमा भएको थियो । यहाँ सान्ता क्रुज चर्चको छत खस्यो ।

तटीय प्रान्त तामौलिपासका प्रहरीले छाना खस्दा चर्चमा भएको सामूहिक प्रार्थना सभामा करिब १०० जना उपस्थित रहेको बताएको छ । सामाजिक सञ्जालमा सार्वजनिक भइरहेका तस्बिरमा मानिसहरूले भग्नावशेष हटाउने कोसिस गरिरहेको देखिएको छ ।

तस्बिरमा चर्च नजिकै आपत्कालीन सेवासँग सम्बन्धित व्यक्ति र गाडी देखिएको छ । भग्नावशेषमा पुरिएका मानिसको आवाज सुन्न आसपासको क्षेत्रमा शान्ति कायम राख्न अधिकारीले निर्देशन दिएको छ ।