नेपालअखबार, काठमाडौँ। हिन्दू धर्मावलम्बीले श्रावण शुक्ल पञ्चमीका दिन नाग देवताको पूजा गर्ने परम्परा अनुसार आज देशभर घरघरमा नागको तस्बिर टाँसी पूजा तथा आराधना गरी नाग पञ्चमी मनाइएको छ।
यस अवसरमा घरको मूल ढोकामाथि नागको तस्बिर टाँसी दूध, अक्षता, फूल र दुबो लगायत पूजा सामग्री चढाएर नागको पूजा गर्ने चलन छ। नागको पूजा गरेमा सर्पको भयबाट मुक्ति मिल्नेछ। त्यसैगरी घरमा सुख, शान्ति र समृद्धि कायम हुने धार्मिक विश्वास समेत रहँदै आएको छ।नागपञ्चमीका अवसरमा काठमाडौँ उपत्यकाका विभिन्न नागस्थान तथा मन्दिरहरूमा बिहानैदेखि भक्तजनको बाक्लो भीड लागेको छ। नागपोखरी, टौदह र नागदह लगायतका स्थानहरूमा विशेष पूजा तथा धार्मिक गतिविधिहरू भइरहेका छन्।धार्मिक महत्त्वका साथै नागपञ्चमीलाई प्रकृति र सर्प संरक्षणसँग जोडेर पनि हेरिने गरिन्छ। खेतबारीमा पाइने सर्पले मुसा लगायतका जीव नियन्त्रणमा सहयोग पुर्याउने भएकाले पर्यावरणीय सन्तुलनमा नागको महत्त्वपूर्ण भूमिका रहेको छ।
