नेपालअखबार,काठमाडौं । पृथ्वी राजमार्गको कृष्णभिरमा सडक सुरक्षाका लागि बनाइएको ग्याबियन वाल भासिएको छ ।
अवरल वर्षाका कारण पुरानो सडकको ग्याबियन वाल भासिएको जिल्ला प्रहरी कार्यालय धादिङका डीएसपी प्रकाश दाहालले बताए ।
पुरानो सडकको ग्याबियन वाल केही तल खसेको कारण कृष्णभिरमा बनाइएको नयाँ ट्र्याक समेत जोखिममा परेको छ ।
डीएसपी दाहालले भने, ‘नयाँ ट्र्याक खोलिएको भन्दा केही तल रहेको पुरानो सडकको ग्याबियन वाल भासिएको छ । यसको असर नयाँ ट्र्याकमा पर्न सक्छ ।’
सडक विभागले पनि पृथ्वी राजमार्गको कृष्णभिरमा सडकको नदीतर्फको ग्याबियन वाल केही तल झरेको जनाएको छ ।
विभागले भनेको छ, ‘हाल सञ्चालन भइरहेको सडक माथिको स्लोपमा कुनै समस्या देखिएको छैन ।’
प्रोजेक्ट टिमले सडकको अवस्था मोनिटरिङ गरिरहेको विभागले जनाएको छ ।
लगातारको वर्षाले नयाँ ट्र्याकलाई सपोर्ट गर्न बनाइएको ग्याबियन भासिएर खसेको बेनीघाट रोराङ गाउँपालिका-७ का वडाध्यक्ष कुमार बस्नेतले जानकारी दिए ।
उनले भने, ‘नयाँ ट्र्याकका लागि जुन ग्याबिनको सपोर्ट भाग थियो । त्यही भाग खसिसकेको छ । त्यसैले एकदमै खतरा छ । तल्लो भाग खसिसकेकोले अत्यन्तै खतरा छ । कृपया यो बाटो भएर यात्रा नगर्न अनुरोध गर्दछु ।’
गत १० र १४ भदौमा भोटेकोशी र त्रिशूलीमा आएको बाढीले कृष्णभिरमा सडकखण्ड कटान गरेको थियो । बाढीले सडक कटान गरेपछि सो राजमार्ग लामो समय बन्द भएको थियो । सडक कटान भएको उक्त स्थानमा नयाँ ट्र्याक खोलेर १ असोजदेखि राजमार्ग सञ्चालनमा ल्याइएको थियो ।