नेपालअखबार, काठमाडौं । सरकारले यसअघि तय गरेको मर्यादाक्रममा केही हेरफेर गर्दै विधायन व्यवस्थापन समितिले पेस गरेको राष्ट्रिय मर्यादा सम्बन्धमा व्यवस्था गर्न बनेको विधेयक राष्ट्रिय सभाबाट मंगलबार पारित भएको छ । यसअघि सरकारले निर्धारण गरेको राष्ट्रिय मर्यादा अपूर्ण रहेको भन्दै आलोचना हुँदै आएको थियो ।
२०७६ वैशाख १६ मा राजपत्रमा प्रकाशित मर्यादाक्रमलाई हेरफेर गर्दै राष्ट्रियसभामा गैरसरकारी विधेयक दर्ता भएको थियो । सभाले छलफलका लागि भन्दै गत चैतमा विधेयक विधायन समितिमा पठाएको थियो ।
राष्ट्रिय सभाले संविधानको धारा २९३ मा भएको संवैधानिक परिषद्को व्यवस्था अनुसार प्रधानन्यायाधीशको मर्यादाक्रम माथि राखेका छन्। अबको मर्यादाक्रममा राष्ट्रपति, उपराष्ट्रपति, प्रधानमन्त्री, प्रधानन्यायाधीश, सभामुख र राष्ट्रिय सभाको अध्यक्ष हुनेछन्। सभामुख र राष्ट्रिय सभाका अध्यक्षको एउटै मर्यदाक्रम हुनेछ। तर दुबै सहभागी हुने कार्यक्रममा सभामुखको मर्यादा अघि र राष्ट्रिय सभाका अध्यक्षको लगत्तै हुनेछ।
त्यसपछि पूर्वराष्ट्रपति, उपराष्ट्रपति, पूर्वप्रधानमन्त्री, मन्त्रिपरिषद्का पूर्वअध्यक्ष, पूर्वप्रधानन्यायधीशको मर्यादाक्रम निर्धारण गरिएको छ। लगत्तै पूर्वसभामुख, राष्ट्रिय सभाका पूर्वअध्यक्ष, प्रतिनिधि सभाका विपक्षी दलका नेताको मर्यादाक्रम कायम गरिएको छ।
