नेपालअखबार,काठमाडौँ । प्रतिनिधि सभाका सभामुख देवराज घिमिरेले संसद् र सांसदहरू मतदाताहरूको जनप्रतिनिधि मात्र नभई अन्तर्राष्ट्रिय सहकार्यलाई सुदृढ पार्ने साधन पनि भएको बताएका छन् ।
स्विट्जरल्याण्डको जेनेभामा संसद्का सभामुखहरूको छैटौँ विश्व सम्मेलनमा धारणा राख्दै सभामुख घिमिरेले संसदीय प्रक्रियाका माध्यमबाट सरोकारवाला पक्षहरूको दृष्टिकोणहरूलाई समेत निर्णय प्रक्रियामा समेटेर अझ गतिशील विश्व निर्माणमा सहयोग पुर्याउन सम्भव रहेको बताए ।
अन्तर व्यवस्थापिका सङ्घ (आईपीयु) र संयुक्त राष्ट्रसङ्घ (युएन)को आयोजनामा भएको “शान्ति, न्याय र समृद्धिका लागि संसदीय सहकार्य तथा बहुपक्षीयता” विषयक सम्मेलनमा उनले सम्मेलनले अन्तर्राष्ट्रिय सहकार्यको भूमिकालाई यथार्थपरक ढङ्गले प्रतिबिम्बित गरेको बताए ।
अहिलेको विश्व समुदायलाई बढ्दो द्वन्द्व, व्यापार तनाव, आर्थिक तथा सामाजिक असमानता, जलवायु परिवर्तनले निम्त्याएको अस्तित्वको सङ्कट, महामारी र नयाँ प्रविधिहरूले जटिल परिस्थितसँग जुध्न बाध्य पारेको सन्दर्भमा यो सम्मेलनको सार्थकता थपिएको उनको भनाइ थियो ।
सभामुख घिमिरेले “सञ्जालीकृत विश्व शासनले” ले परम्परागत भन्दा पृथक् स्वरूपको कूटनीति तथा अन्तर्राष्ट्रिय सम्बन्धबाट सबै सम्बन्धित पक्षहरू समावेश भएको समावेशी प्रणालीतर्फको रूपान्तरणको आह्वान गरेको बताए ।
उनले विश्व शासन निर्माणमा सरकार मात्र होइन, नागरिक समाज, निजी क्षेत्र, शैक्षिक संस्थाहरू र सामुदायिक सङ्गठनहरूलाई परिभाषित गर्नुपर्ने तथा खुलापन र सहभागितामूलक संवादलाई प्राथमिकता दिन जरुरी रहेको बताए ।
आजको संसार विभिन्न मूल्य, प्राथमिकता र स्वार्थहरूबाट निर्देशित भएको बताउँदै उनले यस्तो अवस्थामा साझा समझदारी बनाउनु निकै कठिन भएको बताए ।
सङ्गठित समूहहरूको अवाञ्छित प्रभावलाई बेवास्ता गर्दै बहुपक्षीय संस्थाहरूको वैधतालाई बलियो बनाउन आवश्यक रहेको उनको भनाइ थियो ।