नेपालअखबार,कोलकाता । नेपालको राजनीतिक अस्थिरतालाई जोडेर पश्चिम बङ्गालमा ‘सामूहिक विद्रोह’ को आह्वान गरेको आरोपमा भारतीय जनता पार्टी (भाजपा) का पूर्वसांसद अर्जुन सिंहविरुद्ध १४ वटा एफआईआर दर्ता गरिएको छ। उनको विवादास्पद टिप्पणीपछि भाजपाका नेताहरूले पनि उनबाट दूरी बनाएका छन्।
सिंहले बुधबार नेपालको राजनीतिक अशान्तिसँग समानान्तरता जोड्दै विवादास्पद टिप्पणी गरेका थिए। ‘पश्चिम बंगालका युवाहरू यो भ्रष्ट सरकारलाई हटाउन कहिले उठ्छन्? रक्तपात बिना कुनै भ्रष्ट शासनको अन्त्य हुँदैन… बेरोजगार युवाहरूले नेपालबाट सिक्नुपर्छ। जब बंगालका युवाहरू उठ्छन्, यदि उनीहरूले मलाई बोलाए भने, म अगाडिबाट नेतृत्व गर्न तयार छु,’ उनले भनेका थिए।
बाराकपुर प्रहरी प्रमुख मुरलीधर शर्माले सिंहविरुद्ध १४ वटा मुद्दा दर्ता भएको र अनुसन्धान भइरहेको पुष्टि गरेका छन्। यद्यपि, सिंहले आफ्नो अडानमा अडिग रहँदै भनेका छन्, ‘म फेरि एकपटक दोहोर्याउँछु, यो भ्रष्ट सरकारलाई हटाउन बङ्गालमा सामूहिक विद्रोहको आवश्यकता छ। मेरो विरुद्धमा पहिले नै १८४ वटा एफआइआर छन्, अब ४०० वटा होस्, म त्यसको स्वागत गर्छु।’
सिंहको भनाइबाट भाजपाले भने आफूलाई अलग राखेको छ। विधानसभामा भाजपाका प्रमुख सचेतक शङ्कर घोषले भने, ‘हामी, निर्वाचित प्रतिनिधिहरूको रूपमा, छिमेकी देशको हालको राजनीतिक घटनाक्रमबारे कुनै पनि टिप्पणी गर्दैनौँ। यी संवेदनशील विषय हुन्।’
भाजपाका प्रदेश अध्यक्ष सामिक भट्टाचार्यले पनि नेपालको घटनाक्रमबारे टिप्पणी गर्नबाट आफूलाई रोक्दै पार्टी लोकतान्त्रिक प्रक्रियामा विश्वास गर्ने बताएका छन्। उनले ‘सामूहिक विद्रोह’ को सट्टा ‘सामूहिक जागरूकता’ को लागि आह्वान गरेका छन्।
यता, तृणमूल कांग्रेस (टीएमसी) का बाराकपुर सांसद पार्थ भौमिकले सिंहमाथि मुख्यमन्त्री ममता बनर्जीको हत्याको षड्यन्त्र रचेको आरोप लगाएका छन्। उनले सिंहको विद्रोहको आह्वान हिंसाका लागि प्रत्यक्ष उक्साहट भएको बताए।