नेपालअखबार,बेइजिङ । चिनियाँ कम्युनिस्ट पार्टीले दशकौँयताकै ठुलो कदम उठाउँदै नौजना शीर्ष जनरललाई पार्टी र सेनाबाट एकैपटक निष्कासन गरेको छ। देशको रक्षा मन्त्रालयले जारी गरेको विज्ञप्तिमा ती जनरलहरू गम्भीर आर्थिक अपराधमा संलग्न भएको आशङ्कामा कारबाही गरिएको जनाएको छ।
निष्कासित मध्ये अधिकांश तीनतारे जनरल थिए र पार्टीको केन्द्रीय समितिका प्रभावशाली सदस्य समेत थिए। मन्त्रालयले यो कदमलाई भ्रष्टाचारविरुद्धको अभियानको हिस्सा भनेको छ, तर विश्लेषकहरू यसलाई राजनीतिक सफाइको रूपमा पनि हेर्दै छन्। यो कारबाही पार्टीको केन्द्रीय समितिको आगामी प्लेनमअघि आएको हो, जहाँ चीनको आर्थिक विकास योजना र नयाँ सदस्यहरूको चयनबारे छलफल हुनेछ।
निष्कासित जनरलहरूमा उपरक्षा आयोगका उपाध्यक्ष हे वेइडोङ पनि छन्, जो राष्ट्रपति सी चिनफिङपछि चीनको सेनाका दोस्रो सर्वाधिक शक्तिशाली व्यक्ति मानिन्थे। उनी पछिल्लो पटक मार्च महिनामा सार्वजनिक रूपमा देखिएका थिए र त्यसयता बेपत्ता रहेका कारण उनीमाथि छानबिन भइरहेको अनुमान फैलिएको थियो। हे वेइडोङ पोलिटब्युरोका सदस्य समेत रहेका थिए, जसले उनलाई जाँचको सामना गर्ने पहिलो पोलिटब्युरो सदस्य बनायो।
रक्षा मन्त्रालयको विज्ञप्तिअनुसार ती नौ जनरलहरूले पार्टी अनुशासन गम्भीर रूपमा उल्लङ्घन गरेका र अत्यधिक ठुलो रकम संलग्न गम्भीर अपराधमा संलग्न रहेको बताइएको छ।
मन्त्रालयले उनीहरूलाई सैन्य अभियोजनको तयारी भइरहेको उल्लेख गर्दै यो कारबाहीलाई ‘पार्टी र सेनाको भ्रष्टाचारविरुद्धको अभियानमा महत्त्वपूर्ण उपलब्धि’ भनेर व्याख्या गरेको छ।
बीबीसी