नेपालअखबार, काठमाडौँ । इङ्लिस फुटबल क्लब सेफिल्ड वेड्नसडेका र नटिङ्घम फरेष्टका पूर्व खेलाडी क्रिस बार्ट विलियम्सको निधन भएको छ । बार्ट विलियम्सको ४९ वर्षको उमेरमा अमेरिकामा निधन भएको उनको पूर्व क्लब सेफिल्ड वेड्नसडेले जनाएको छ ।
पछिल्लो समय उनी अमेरिकामा प्रशिक्षकको भूमिकामा सक्रिय थिए । ‘क्लबका पूर्व खेलाडी क्रिस बार्ट विलियम्सको निधनबाट हामी स्तब्ध: भएका छौं,’ सेफिल्ड वेड्नसडेद्वारा मंगलबार जारी विज्ञप्तिमा भनिएको छ ।
बार्ट विलियम्सले आफ्नो खेलजीवनको सुरुआत लेटन ओरियन्टबाट गरेका थिए । त्यसपछि सन् १९९१ मा उनी सेफिल्ड वेड्नसडेमा आबद्ध भएका थिए । सन् १९९५ सम्म उक्त क्लबमा रहँदा बार्ट विलियम्सले एक सय खेल खेलेका थिए ।
उनी सन् १९९५ मा नटिङ्घम फरेष्टमा आबद्ध भएका थिए । सन् २००२ सम्म उक्त क्लबमा रहँदा उनले दुई सयभन्दा बढी खेल खेलेका थिए । बार्ट विलियम्सको निधनको समाचार सार्वजनिक भएपछि विभिन्न क्लबका पदाधिकारी, खेलाडी, प्रशिक्षक र समर्थकहरूले उनीप्रति हार्दिक श्रद्धाञ्जली व्यक्त गरेका छन् । उनको निधनको कारण भने खुलाइएको छैन ।
