नेपालअखबार, पोखरा । कास्की जिल्लाको पोखरा–१७, छोरेपाटनमा अवस्थित दुर्गा मन्दिर व्यवस्थापन समितिको आव्हानमा यही चैत्र २३ गते चैत्राष्टमीको अवसरमा नवग्रह शान्ति पाठ एवं रुद्राभिषेकका साथ कोटी दिप प्रज्वलन कार्यक्रम गरिने भएकोछ ।
मन्दिर व्यवस्थापन समितिको आव्हानमा यही चैत्र २३ गते चैत्राष्टमीको अवसरमा जगतको शान्ति र सम्वृद्धि, लोककल्याण, नवग्रह शान्ति, पितृ उद्धार एवं दुर्गा मन्दिर शक्तिपीठ धामको श्रीवृद्धिको लागि विन्दवासिन मन्दिरका व्यासासिन पण्डित डा. भोला नारायण रेग्मी मुख्य वाचक र अन्य गुरुहरुद्वारा सहस्र सप्तचण्डी मन्त्रजाप, सहस्रवन, नवचण्डीपाठ, वेदपाठ, देवी महिमा प्रवचन, नवग्रह शान्ति पाठ एवं रुद्राभिषेकका साथ कोटी दिप प्रज्वलन एवं प्रसाद वितरण कार्यक्रम आयोजना गरिने भएको पत्रकार सम्मेलनमा वताइएको छ ।
कोटी दिप प्रज्ज्वलनको पूर्व सन्ध्यामा वाजा गाजा, भजन कृतन सहित शिव पार्वती झाँकीद्धारा छोरेपाटन वजार परिक्रमा गरिने भजन संयोजक हिमलाल उपाध्यायले वताए ।
सुरुवाती अवस्थामा केही आरोह र अवरोह पार गर्दै माताको आराधना एवं पूजापाठ गर्दै केही समय स्थानीय भक्तहरुद्वारा पूजा आजा गर्दै आइरहेका यस दुर्गा मन्दिरमा विभिन्न भक्तजनहरूद्वारा गणेश मन्दिर, सन्तोषी माताको मन्दिर, रातो मच्छिन्द्रनाथको मन्दिर, १०८ शालिग्राम, १०८ शिवलिङ्ग स्थापना गरिएको थियो ।
मन्दिरको विशेष आम्दानीको श्रोतको रुपमा भक्तजनहरुको विशेष सहयोगमा नवदुर्गा पुजा महोत्सव, शनि त्रयोदशी, विशेष पुजा महोत्सव, मंगलचौथीं पुजा एवं शिवरात्री पुजा सहयोग आदिबाट दैनिक पुजा चल्दै आएको दुर्गा मन्दिर व्यवस्थापन समितिका अध्यक्ष नारायण प्रसाद अधिकारी (शर्मा)ले वताए ।
सुन्दर नगरी पोखराको बीचमा रहेको पोखरा महानगरपालिका वडा नं. १७ र २२ को सिमानामा रहेको दुर्गा मन्दिर शक्तिपीठ धामको स्थापना २०३७ सालमा भएको र एकादशी तिथिको पावन दिनमा स्वर्गीय रुद्रनाथ बराल र शशीधर बरालबाट जग्गा प्राप्त गरी तत्कालिन दुर्गा मन्दिर व्यवस्थापन समितिका अध्यक्ष दुर्गाबहादुर श्रेष्ठको परिकल्पनामा स्थापना भएको समितिका बरिष्ठ उपाध्यक्ष रविन्द्रराज बरालले वताए ।
समितिद्वारा मन्दिरको संरक्षण गर्दै अवनेश्वर शिव मन्दिर, गण्डकी प्रदेशको एक मात्र १०८ पिपल पुण्यधाम र सूर्य चक्र शनिदेव शिला स्थापनाका साथै विभिन्न देवीदेवताका मुर्ति विग्रह स्थापना गरी आफ्नो दैनिक पूजापाठको लागि समितिद्वारा पण्डित रामप्रसाद नेपाललाई पण्डित नियुक्ति गरी विगत वर्षहरूदेखि दैनिक पूजा पाठ एव आराधना गरिदै आएको उपाध्यक्ष मोहनलाल पौडेलले वताए ।
कार्यक्रममा कर्ताको रुपमा सहभागी हुनको लागि १ लाख दिप प्रज्ज्वलनमा बाती, तिलको तेल र पुजा सामग्रीको लागी लाग्ने खर्च ५ हजार १ सय र एकमुष्ट भुक्तानी गर्न चाहनुहुने महानुभावहरुलाई समितिद्वारा व्यवस्था मिलाइएको पनि सो अवसरमा जानकारी दिइएको सचिव ध्रुबराज बरालले वताए ।